Një gazetar nga mediumi “Periskopi” ka raportuar se redaksia e tyre ka marrë një e-mail kërcënues, pas publikimit të një artikulli me titullin “Nëntë punonjës të Fakultetit të Mjekësisë marrin rrogë në QKUK pa punuar fare”.
Siç ka njoftuar Asociacioni i Gazetarëve të Kosovës (AGK), mesazhi kërcënues kërkon largimin e artikullit me një “porosi” për gazetarët.
“Ju gazetarë kujdes me shkrime, sepse shumë gazetarë po uu heqin kryet për shkrime ose po ua zajnë peng familjarët. Ma mirë duaje pa problem, sepse paratë për klikime janë me probleme familjare”, shkruhet në një pjesë të mesazhit.
AGK-ja ka reaguar ndaj këtij kërcënimi dhe ka ftuar Policinë e Kosovës të hetojë menjëherë kërcënimin dhe t’i ndërmarrë masat e nevojshme për të garantuar sigurinë e gazetarëve të “Periskopi”.
AGK gjithashtu ka ftuar Prokurorinë dhe organet e drejtësisë të Kosovës që të bëjnë punën e tyre për të trajtuar rastin dhe për të garantuar lirinë dhe sigurinë e medias në Kosovë.