Komuna e Obiliqit ka arritur një rezultat të shkëlqyer në transparencë e llogaridhënie në shërbim të qytetarëve, duke u renditur e dyta në nivel vendi për vitin 2022.
Kjo është një pasqyrë e përkushtimit dhe e performancës së mirë që ka treguar qeverisja komunale nën udhëheqjen e kryetarit Xhafer Gashi.
Si një shpërblim për këtë arritje, “Komuna e Obiliqit është përfituese e Grantit të Performancës Komunale (GPK) në vlerë prej 707,119.98 euro, i cili financohet nga Ministria e Administrimit dhe Pushtetit Lokal (MAPL), Zyra Zvicerane për Zhvillim dhe Bashkëpunim, Suedia dhe Norvegjia. Ky grant do të shfrytëzohet për të realizuar projekte dhe investime që do të kontribuojnë në zhvillimin ekonomik dhe social të komunës”.
Ministri i MAPL-së, Elbert Krasniqi, e përshëndeti komunën e Obiliqit për rezultatin e lartë në transparencë e llogaridhënie dhe e inkurajoi të vazhdojë me këtë ritëm.
Ndryshe, GPK-ja është një program që vlerëson dhe shpërblen komunat për arritjet e tyre në fusha të caktuara të qeverisjes lokale, siç janë transparenca, llogaridhënie, menaxhimi financiar, planifikimi strategjik dhe sundimi i ligjit.