Këngëtari nga Shqipëria, Jozefin Marku është shoqëruar në Komisariatin nr.6 për veprime të mëtejshme lidhur me një konflikt të pak ditëve më parë me Eduart Kuçin në mbikalimin e Rinasit.
Siç raportojnë mediat në Shqipëri nga hetimet e deritanishme u zbulua se video është regjistruar në Tiranë tek mbikalimi i Rinasit.
Kujtojmë se ditë më parë u bë publike një video ku Jozefin Marku bashkë me disa të tjerë sulmonin fizikisht Eduart Kuçin.
Po ashtu sipas raportimeve, mësohet se bashkë me Markun është shoqëruar edhe një person tjetër i përfshirë në këtë ngjarje.
Po ashtu janë sekuestruar pamjet e kamerave të sigurisë në zonë dhe po punohet për identifikimin e personave që shfaqen në video.
Një ditë më parë, Prokuroria e Pejës lëshoi fletëarrest për Markun, në lidhje me sulmin fizik ndaj Kuçit.
Zëdhënësi i Prokurorisë Themelore në Pejë, Shkodran Nikçi, për Dukagjinin bëri të ditur se prokurori kujdestar ka hapur rast penal ndaj J.M., shtetas i Republikës së Shqipërisë.
“Prokurori i shtetit nga Prokuroria Themelore në Pejë, përkatësisht prokurori kujdestar, me vetiniciativë ka hapur rast penal ndaj J.M., shtetas i Republikës së Shqipërisë, për veprën penale ‘Lëndim i lehtë trupor’ të shkaktuar ndaj shtetasit të Republikës së Kosovës E.K.”, u shpreh Nikçi.