Kryetari i Kuvendit, Glauk Konjufca, pas ceremonisë së nënshkrimit të aplikimit të Kosovës për anëtarësim në Bashkimin Evropian, e ka quajtur rrugëtim të gjatë dhe aspak të lehtë.
I pari i Kuvendit, në fjalën e tij pas ceremonisë, ka thënë se Kosova e meriton të bëhet vend kandidat në Bashkimin Evropian.
Po ashtu, Konjufca për këtë aplikim ka thënë se është hapi i parë zyrtar drejt BE-së.
Ky rrugëtim kalon përmes Komisionit Evropian nga i cili kryetari i Kuvendit, ka thënë se presin qe t’ia rekomandojë BE-së që t’ia japë statusin e kandidatit.
“Ne meritojmë të bëhemi vend kandidat dhe ta fillojmë rrugën tonë drejt hapjes së negociatave”, ka deklaruar ai.
“Sot është ditë me të vërtetë e rëndësishme për Kosovën, meqë jemi mbledhur me shumë krenari e përkushtim që ta nënshkruajmë letrën e kërkesës në emër të Kosovës për aplikim për anëtarësim në Bashkimin Evropian”, ka deklaruar ai gjatë fjalës së tij në ceremoninë e nënshkrimit.
Sipas tij, anëtarësimi në këtë union është i rëndësisë së veçantë, sepse BE ofron stabilitet, demokraci, siguri, prosperitet zhvillimor, barazi, konkurrenca e ndershme dhe lëvizja e lirë e njerëzve dhe punëtorëve e mallrave dhe shërbimeve të kapitalit janë në thelbin e saj.
“Një union i cili me të vërtet e stimulon rritjen e ekonomikë të popujve dhe mirëqenien e tyre, ndihmon në krijimin e më shumë vendeve të punës si dhe e mbështet rritjen në një treg prej 450 milionë konsumatorësh”, është shprehur ai.