Kryetari i Kuvendit të Kosovës, Glauk Konjufca, gjatë takimit të tij me përfaqësuesit e Komisionit të Venecias, të njëjtit i ka njoftuar për objektivat e legjislativit të këtij mandati.
Pas pritjes në takim të komisionit të Venecias që ishte në përbërje të Dan Meridor, James Hamilton dhe Michael Janssen, si dhe zëvendësshefin e Zyrës së Këshillit të Evropës në Kosovë, Tankut Soykan, Konjufca e ka vlerësuar rolin e këtij komisioni në ofrimin e rekomandimeve në lidhje me çështjet ligjore.
“Kryetari Konjufca i informoi të pranishmit në lidhje me agjendën e legjislativit dhe objektivat që pritet të realizohen gjatë këtij mandati, duke pasur si prioritet për nga rëndësia edhe Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme”, thuhet në njoftimin e zyrës së kuvendit të Kosovës.
“Kreu i Kuvendit falënderoi Komisionin e Venecias për bashkëpunimin me Republikën e Kosovës dhe vlerësoi rolin e këtij Komisioni në ofrimin e opinioneve dhe rekomandimeve në lidhje me çështjet ligjore që trajtohen në institucionet e vendit tonë”, vijon njoftimi.
Sipas Konjufcës, Kuvendi si organi më i lartë legjislativ i vendit, ka rol shumë të rëndësishëm në miratimin e kornizës ligjore dhe kontrollin e zbatimit të legjislacionit në fuqi.
Gjatë këtij takimi, Konjufca ishte i shoqëruar nga deputeti Adnan Rrustemi dhe këshilltarët e tij.