Kryetari i Partisë Demokratike të Kosovës, Memli Krasniqi, gjatë një vizite zyrtare në Bruksel ka takuar të dërguarin e posaçëm për dialogun Kosovë-Serbi, Miroslav Lajçak.
Gjatë takimit, Krasniqi ka shprehur qëndrimin e tij dhe të PDK-së në lidhje me draftin e propozuar të statutit të Asociacionit, duke theksuar se duhet të jetë në përputhje me Kushtetutën dhe ligjet e Republikës së Kosovës dhe të mos krijohet një nivel i ri i pushtetit me kompetenca ekzekutive.
“Edhe një herë, emisarit Lajçak i ripërsërita qëndrimin tim dhe të PDK-së se statuti i Asociacionit duhet të jetë në pajtim me Kushtetutën dhe ligjet e Republikës së Kosovës, të mos krijojë një nivel të ri të pushtetit dhe të mos ketë kompetenca ekzekutive”, ka shkruar Krasniqi në Facebook.
Po ashtu, ai ka përsëritur kërkesën e tij drejtuar Lajçakut për të ndikuar në heqjen e sanksioneve të BE-së ndaj Kosovës.
“Në takim, emisarit Lajçak, po ashtu, i kërkova që të ndikojë që Bashkimi Evropian t’i heqë sa më parë sanksionet e padrejta ndaj Republikës së Kosovës”, ka shkruar Krasniqi.
Kreu i PDK-së gjatë qëndrimit në Bruksel ka marrë pjesë në tryezën për Ballkanin Perendimor, organizuar nga grupi politik liberal i Parlamentit Evropian, Renew Europe.