Kryetari i Partisë Demokratike të Kosovës, Memli Krasniqi, ka shkruar për masakrat e 2 majit të vitit 1999 në Kosovë.
“Më 2 maj 1999, forcat kriminale serbe kryen një ndër masakrat më të përgjakshme në Kosovë – duke ekzekutuar në mënyrat më çnjerëzore 116 civilë të pafajshëm, burra, gra, djem dhe vajza, në Studime të Vushtrrisë,” ka shkruar Krasniqi.
E përgjegjësi për krimet e kryera gjatë luftës në Kosovë, sipas Krasniqit, nuk kanë marrë ende serbët.
“Përkundër kësaj, edhe sot, 25 vjet pas, asnjë nga kriminelët serbë, ekzekutorë apo urdhërdhënës, nuk ka dalë para drejtësisë vendore apo ndërkombëtare për të dhënë përgjegjësi për këtë krim të kryer,” ka shkruar Krasniqi.
“Kosova nuk do të resht asnjëherë së kërkuari drejtësi për të gjitha krimet gjenocidale, të kryera ndaj popullit tone, e përjetshme është lavdia për martirët e Studimes!”