Ministri i Administrimit të Pushtetit Lokal(MAPL), Elbert Krasniqi, në një konferencë për media pas mbledhjes së Qeverisë, ka diskutuar për procesin e shkarkimit të katër kryetarëve të komunave në veri të vendit, përmes peticioneve të iniciuara nga qytetarët.
Krasniqi ka thënë se në Mitrovicë të Veriut, Leposaviq dhe Zubin Potok kanë mbetur edhe dy javë afat për t’i mbledhur nënshkrimet për shkarkimin e kryetarëve, ndërsa në Zveçan janë mbetur edhe pesë ditë më shumë.
Ministri i MAPL-së ka thënë se kryetarja e Kuvendit Komunal të Zveçanit nuk e ka procesuar kërkesën e qytetarëve në Komisionin Qendror të Zgjedhjeve (KQZ) dhe kësisoj grupi i qytetarëve i është drejtuar vetë MAPL-së dhe KQZ-së bazuar në Udhëzimin Administrativ.
“Nga përgjegjësia e nivelit qendror dhe lokal, të gjitha obligimet janë përmbushur. Tashmë i kemi katër grupe të qytetarëve në veri të vendit, të cilët janë autorizuar për mbledhjen e nënshkrimeve. Të gjitha grupet kanë autorizimet dhe dokumentet e nevojshme. Kosova vazhdimisht ka qenë konstruktive dhe udhëzimi administrativ e dëshmon këtë”, ka thënë Krasniqi.
Në Mitrovicë të Veriut, Leposaviq dhe Zubin Potok ka nisur më 22 dhjetor mbledhja e nënshkrimeve për shkarkimin e kryetarëve shqiptarë.
Ndërsa në Zveçan, ka nisur më 27 dhjetor. Afati për mbledhjen e nënshkrimeve është 30 ditë.
Ndërkaq, lidhur me masat e BE-së të vendosura ndaj Kosovës, ai ka deklaruar se janë të padrejta pasi nuk iu janë adresuar palës që ka shkaktuar tension.