Profesori i Fakultetit Juridik, Kolë Krasniqi, ka deklaruar se situata aktuale politike në vend nuk lë shumë hapësirë për arritjen e një marrëveshjeje për zgjedhjen e presidentit, duke theksuar se rrethanat e krijuara mund të çojnë drejt zgjedhjeve të reja.
Në emisionin FIVE, Krasniqi tha se sipas zhvillimeve dhe mungesës së vullnetit politik, zgjedhjet e reja duken si opsion gjithnjë e më i mundshëm.
Ai ka shtuar se nuk beson që ekziston një marrëveshje apo koalicion i mundshëm për zgjedhjen e presidentit konsensual, për shkak të qëndrimeve të ndryshme të partive politike.
Ai ka theksuar gjithashtu se, për shkak të afrimit të zgjedhjeve, do të ishte e udhës që të kompletohet Komisioni Qendror i Zgjedhjeve, përfshirë emërimin e anëtarit tjetër që mungon.
Sipas tij, KQZ-ja duhet të jetë plotësisht e konstituar për të mbikëqyrur proceset zgjedhore që, sipas tij, mund të mbahen 45 ditë pas shpërndarjes së Kuvendit.
“Nuk e besoj në bazë të këtij vullneti i cili po manifestohet nga strukturat partiake qofshin ato opozitare apo në pushtet, janë krijuar rrethanat e caktuara që e pamundësojnë konsolidimin në zgjedhjen e një presidenti konsensual i cili do të ishte i pranueshëm për të gjitha palët. Prandaj do të kishe qenë e udhës që para përfundimit të mandatit të saj ta emërojë edhe anëtarin tjetër të KQZ-së dhe të konstituohet ky komision i cili është kyç dhe detyra të qarta të përcaktuara më ligj e kushtetutë për mbarëvajtjen dhe mbikëqyrjen e procesit zgjedhor që pritet të mbahen 45 ditë pas shpërndarjes së Kuvendit”, ka deklaruar ai.
PDK ka kërkuar nga presidentja aktuale Vjosa Osmani që të procedohet pa vonesë emërimi i anëtarit të dytë të saj në KQZ, ndërsa në Lëvizjen Vetëvendosje insistojnë se anëtari i tretë i takon kësaj partie.