Komunat nuk pajtohen me kryeministrin Albin Kurti, i cili një ditë më parë tha se ato po përdoren për t’i bërë opozitën qeverisë së tij.
Kreu i Ekzekutivit pretendoi se kështu ka ndodhur në disa raste deri më tani.
Por, ky pretendim nuk qëndron, sipas kryetarit të Vushtrrisë, Ferit Idrizi.
“Asnjë element nuk e gjen që unë e luaj rolin e opozitës madje as karshi qytetarëve. Unë jam kryetar i të gjithë qytetarëve pa dallim. Përditë komunikoj me qytetarë. E tash nëse shprehna me terminologji të mjekësisë unë jam një daltonist partiak”, ka thënë Idrizi.
Nga një kënd tjetër po e sheh situatën drejtuesi i Asociacionit të Komunave të Kosovës, Sazan Ibrahimi.
Sipas tij, është ekzekutivi ai i cili po tenton t’i centralizojë kompetencat.
“Komunat janë duke I kryer punët e veta, kërkojnë dhe kanë kërkuar një bashkëpunim të sinqertë me nivelin qendror e jo të kemi këso probleme në nivelin qendror. Kemi moskoordinim, mosbashkëpunim dhe bashkëveprim të aktiviteteve. Tendenca e nivelit qendror është centralizimi I kompetencave, marrja e buxhetit, vendimmarrja pa konsulta me komunat”, ka deklaruar Sazan Ibrahimi, kreu i Asociacionit të Komunave të Kosovës.
Kryeministri Kurti në mbledhjen e fundit të Qeverisë tha se qeverisja lokale po përdoret për të bërë opozitë kundër nivelit qendror. Javën e ardhshme pritet të mbahet takimi i katërt ndërmjet Qeverisë dhe komunave, për të diskutuar bashkëpunimin e tyre.