Kryeministri i Irlandës, Leo Varadkar, në kuadër të vizitës së tij në Kosovë, pritet të takohet me kryeministrin e Kosovës, Albin Kurti, e më pas edhe me presidenten Vjosa Osmani.
Varadkar në takimin me Kurtin do të pritet me ceremoni shtetërore, ndërsa takimi zhvillohet në orën 09:30.
Pas takimit, do të ketë një konferencë të përbashkët për media.
Ndërkaq, në orën 11:00, Osmani pret në takim kryeministrin irlandez në ambientet e presidences.
Ndryshe, Varadkar po bën vizitën e parë ndonjëherë të një kryeministri irlandez në Kosovë.
Policia e Kosovës ka njoftuar se do të kujdeset për ofrimin e sigurisë dhe mirëmbajtjen e rendit e qetësisë publike.
“Nga data 10 deri më 11 janar 2024, në Republikën e Kosovës do të qëndrojë për vizitë zyrtare Kryeministri i Irlandës, zotëri Leo Varadkar së bashku me një delegacion shoqërues. Policia e Kosovës, gjatë kësaj vizite do të kujdeset për ofrimin e sigurisë dhe mirëmbajtjen e rendit e qetësisë publike gjatë kohës së lëvizjes së eskortës dhe qëndrimit të delegacionit shtetëror në Kosovë”, thuhet në njoftimin e policisë.