Kryeministri i Kosovës, Albin Kurti, ka marrë një ftesë nga Prokuroria Speciale ndërkohë që po udhëheq mbledhjen e Kryesisë së Lëvizjes Vetëvendosje (LVV) për të përmbyllur listën e kandidatëve për deputetë për zgjedhjet e vitit 2025.
Lajmi është bërë i ditur nga zëdhënësi i Qeverisë së Kosovës, Përparim Kryeziu, i cili ka theksuar se ky veprim është për të ndikuar në procesin zgjedhor.
“Teksa kryeministri Kurti ndodhet në mbledhje të Kryesisë së Lëvizjes VETËVENDOSJE! për të përmbyllur listën e kandidatëve për deputetë nga koalicioni LVV, Guxo dhe Alternativa në zgjedhjet e vitit 2025, nga kryeministria më njoftuan se ka ardhur një ftesë për të nga Prokuroria Speciale”, ka shkruar Kryeziu në Facebook.
Ai ka shtuar se, edhe pse qëllimi ka mbetur i njëjtë, metoda ka ndryshuar, duke e cilësuar këtë si ndërhyrje të sistemit të drejtësisë në procesin zgjedhor.
“Në zgjedhjet e kaluara kishte një vendim gjyqësor i cili ia kishte pamundësuar kandidimin në garën zgjedhore të 14 shkurtit 2021, kurse tash përmes kësaj ftese po tentohet ndikimi në rezultatin e zgjedhjeve të 2025. Qëllimi mbetet i njëjtë. Metoda ka ndryshuar. Kjo është ndërhyrje e sistemit të drejtësisë në proces zgjedhor”, ka shkruar tutje Kryeziu.