Kryeministrja e Suedisë, Magdalena Andersson, është deklaruar se do të japë dorëheqje, pasi Qeveria e saj është mposhtur në zgjedhjet e së dielës.
Koalicioni i saj i qendrës së majtë duket se do të fitojë 173 ulëse, në krahasim me 176 ulëse sa pritet të fitojnë partitë e krahut të djathtë.
Siç shkruan BBC, këto parashikime janë bërë pas numërimit të 99 për qind të votave.
Ndërkaq, udhëheqësi i Partisë së Moderuar, Ulf Kristersson, pritet që të formojë qeverinë e re.
Në rendin e partive që pritet të vijnë në pushtet është edhe ajo e Demokratëve të Suedisë, e cila në fushatë ka pasur temë kyçe luftimin e të shtënave me armë zjarri nga bandat.
Rezultati përfundimtar pritet të konfirmohet pas rinumërimit të votave. Megjithatë Andersson e ka pranuar humbjen, dhe ka thënë se do të japë dorëheqjen zyrtare të enjten.
“Në Parlament, ata kanë një apo dy ulëse më shumë. Është numër i vogël, por krijon shumicën”, ka thënë ajo.
Andersson ka qenë kryeministrja e parë grua në Suedi, e cila pozitën e saj e ka marrë në fund të vitit 2021.
Ndonëse pati dhënë dorëheqje qysh në ditën e parë në pushtet, ajo më pas është kthyer në zyrë.
Ndërkaq, Demokratët Socialë të Anderssonit kanë qeverisur Suedinë prej vitit 2014 dhe kanë dominuar skenën politike prej viteve 1930.
Fushata zgjedhore është dominuar nga rritja e numrit të të shtënave nga bandat, çështjet e imigrimit dhe rritja e çmimeve të rrymës.