Në emisionin Debat Plus, moderatori Ermal Panduri e ka sfiduar ashpër përfaqësuesin e Partisë Shqiptare Demokristiane të Kosovës (PSHDK), Zef Morinën, lidhur me qëndrimin e subjektit të tij ndaj Kodit Civil nëse arrin përfaqësim në Kuvend.
Panduri e pyeti drejtpërdrejt nëse PSHDK “e çon dorën për Kodin Civil”, duke e vënë në pah faktin se partia dikur deklaronte hapur kundërshtimin.
Morina pranoi se PSHDK nuk e ka lexuar ende Kodin Civil.
“Ne më së pari Kodin Civil nuk e kemi pa, se kemi lexu dhe nuk e dimë si është”, deklaroi ai.
Panduri e kritikoi rëndë këtë qëndrim, duke e quajtur të pakuptueshme që një parti me dekada histori politike nuk ka shqyrtuar një dokument kaq të rëndësishëm për të cilin ka pasur pozicion publik. I sfiduar, Morina u përgjigj:
“Ne Kodin Civil para disa viteve që na është ofru e kemi thënë… jemi kundër një veprimi ose ligji i cili është në kundërshtim me programin… nëse nuk parashihet në Kod Civil (hapja e martesave të gjinisë së njëjtë) natyrisht që ne nuk marrim pjesë në votim, përndryshe martesat me gjini të njëjtë ne nuk i pranojmë”, ka thënë ai.