Ndryshe nga rajonet separatiste të Ukrainës, Donjeck dhe Luhansk, Kosova i plotëson kriteret për të qenë shtet i pavarur, ka thënë eksperti i së Drejtës Ndërkombëtare, me bazë në Gjermani, Matthias Hartwig.
Sipas tij, Kosova i plotëson kushtet për të qenë shtet i pavarur, pasi një shtet mund të ekzistojë në qoftë se i përmbush këto tri elemente: territorin e përcaktuar, popullsinë e përhershme dhe kapacitetin udhëheqës.
“Të tria këto elemente, Kosova i plotëson”.
“Në rastin e pjesës lindore të Ukrainës, Rusia dëshiron të formojë një shtet që nuk ekziston, pasi ai është pjesë e një shteti tjetër dhe kjo përbën ndërhyrje të madhe në sovranitetin e një shteti”, ka thënë Hartwig për Radion Evropa e Lirë.
Presidenti i Rusisë, Vladimir Putin, tri ditë para se ta niste pushtimin e Ukrainës, më datë 24 shkurt, ka njohur dy rajonet separatiste të këtij vendi, Donjeck-un dhe Luhansk-un, pra si shtete të pavarura.
“Republikat e Donbasit – siç njihen bashkërisht Donjecku dhe Luhansku – kanë vepruar njësoj si Kosova me shpalljen e pavarësisë.” ka thënë Putin në një takim me Sekretarin e Përgjithshëm të Kombeve të Bashkuara, Antonio Guterres, në Moskë.
