Kryeministri i Kosovës, Albin Kurti, në një intervistë për Deutsche Welle, ka diskutuar edhe për takimin e 14 shtatorit me Vuçiqin, masat ndëshkuese të BE-së ndaj Kosovës dhe izolimin, situatën në veri dhe kërkesa e tij për BE-në.
Kurti ka thënë se javën e ardhshme bëhen gjashtë muaj që nga Marrëveshja e Ohrit dhe se ende nuk ka zbatim të saj.
“Javën e ardhshme bëhen gjashtë muaj prej se zëvendëspresidenti i Komisionit Evropian dhe përfaqësuesi i lartë për politikë të jashtme dhe të sigurisë, Josep Borrel, në Ohër të Maqedonisë së Veriut, tha se ‘We have a deal’, pra kemi marrëveshje, sepse u pranua edhe aneksi i zbatimit. Andaj edhe gjashtë muaj nuk janë pak dhe ja ku jemi sot, në prag të takimit të 14 shtatorit dhe nuk kemi zbatim të marrëveshjes”, ka thënë Kurti.
Kurti ka thënë se janë bërë një vit prej që është prezantuar iniciativa franko-gjermane që mandej u bë propozim i BE-së për një marrëveshje normalizimi ndërmjet Kosovës dhe Serbisë, me njohjen defacto në qendër.