Kryeministri i Kosovës, Albin Kurti ka treguar se pala serbe në “mënyrë të panevojshme dhe artificialisht është duke e eskaluar retoriken ashtu dhe veprimet në fushën e sigurisë”.
Tutje, i pari i qeverisë ka thënë se pala serbe, nuk është duke i lejuar qytetarët serb në veri të Kosovës t’i përkrahin vendimet e Qeverisë.
“Kjo përbën cenim të drejtëpërdrejët si të sigurisë nacionale ashtu dhe të rajonit në tërësi”.
“Këto kërcënime synojnë që padrejtësisht të krijojnë epërsi në negociata, duke kërcënuar Bashkimin Evropian por edhe Shtetet e Bashkuara të Amerikës, apo edhe Mbretërinë e Bashkuar me tensione”.
Sipas Kurtit, kërcënimet për largimin nga institucionet i bëjnë vetëm kriminelët si Milan Radojçiq dhe jo qytetarët që duan të integrohen, se këtë e kanë qëllimin primar.
Më tej, Kurti në fjalën e tij në fillim të mbledhjes së Qeverisë, ka thënë se përfaqësuesit serbë nuk duhet t’i përkrahin interesat e kriminelëve, që nga krimi kanë hyrë në listën e zezë të SHBA-së, por interesat e qytetarëve.
“I siguroj të gjithë qytetarët e pakicës serbe se Qeveria e Kosovës është qenësisht e interesuar për integrimin e plotë të të gjithë qytetarëve të vendit dhe promovimin e plotë të lirisë së lëvizjes dhe përfaqësim të standardeve dhe praktikave evropiane për adresimin e nevojave specifike të minoriteteve”, ka thënë Kurti.
Tutje, ai ka treguar se i janë përkushtuar dialogut të brendshëm dhe se janë të interesuar që këtë dialog ta fuqizojnë edhe më shumë.
“Ju lutem mos e ndiqni retoriken luftënxitëse që po ju imponohet nga mediat luftënxitëse, por të informoheni drejtpërdrejt nga burimet vendimmarrëse”, ka thënë ndër të tjera Kurti.