“Barnat duhet të jenë edhe të disponueshme edhe të përballueshme”.
Kështu ka deklaruar kryeministri i Kosovës, Albin Kurti, i cili ka theksuar se një gjë të tillë e mundëson Projektligji për Çmimin e Produkteve Medicinale, i cili u miratua këtë të mërkurë në Qeveri.
Kurti është shprehur se barnat duhet të jenë të qasshme për qytetarët dhe jo të shtrenjta.
“Nuk mjafton që ato të jenë në raftet e barnatoreve, nëse nuk janë në sirtarët e shtëpive tona. Nuk mjafton që t’i ketë farmacisti, nëse nuk i ka pacienti. Na duhen të dyja, pa kursyer shëndetin dhe duke kursyer xhepin”, ka thënë ai.
Projektligji në fjalë, sipas kryeministrit mundëson të vendosen çmime tavan për barnat në mënyrë që të mos abuzohet me to.
“Projektligji për Çmimin e Produkteve Medicinale, që e miratuam sot në qeveri, na mundëson të përballojmë sëmundjet me barna të përballueshme, të vendosim çmime tavan dhe të unifikuara për ilaçet. Që të ruajmë shëndetin e qytetarëve dhe t’i mbrojmë ata nga abuzimi me çmime”, ka thënë ai.