Kryeministri i Republikës së Kosovës, Albin Kurti, ka pritur në takim sekretarin e shtetit në hije për Çështjet e Jashtme, Komonuelth dhe Zhvillim, David Lammy.
Në njoftimin e Qeverisë thuhet se në bashkëbisedim kujtuan zhvillimet e vitit 1999 dhe rolin vendimtar të Britanisë së Madhe në çlirimin e Kosovës nën drejtimin e laburistëve Tony Blair dhe Robin Cook.
Kryeministri e falënderoi Lammy-n për kontributin e vazhdueshëm të Britanisë së Madhe ndaj Kosovës.
Po ashtu, kryeministri Kurti ka theksuar progresin në Kosovë, duke përmendur faktin që përkundër krizës botërore me pandeminë COVID-19 dhe krizën energjetike, ekonomia e Kosovës ka shënuar rritje të konsiderueshme.
“Së bashku me përmirësimet në indekset e demokracisë dhe sundimin e ligjit që renditin Kosovën të parën në Ballkanin Perëndimor, Kosova është vend ideal për investime për kompanitë nga Britania e Madhe që kërkojnë near-shoring”, ka theksuar kryeministri.
Gjithashtu, në takim Kurti ka veçuar mundësitë për rritjen e shkëmbimit tregtar mes Kosovës dhe Britanisë së Madhe, si dhe investimet në sektorin energjisë.
Ndërsa Qeveria ka bërë të ditur se Lammy ka ofruar bashkëpunimin e tij, pasi ai ka theksuar nevojën e identifikimit sa më shumë fusha të bashkëpunimit dhe partneritetit në mes të dy vendeve, ashtu që Britania e Madhe të mund të ndihmojë sa më shumë Kosovën.
“Në takim u diskutua edhe për çështjet aktuale, duke përfshirë dialogun dhe nevojën për normalizim të marrëdhënieve me Serbinë, si dhe çështjet e sigurisë”, thuhet në njoftim.
Ndër të tjera, sipas njoftimit nga Qeveria, Kurti ka theksuar nevojën për rritjen e bashkëpunimit mes institucioneve të sigurisë së Kosovës dhe Britanisë së Madhe në luftimin e akterëve malinj që synojnë destabilitetin e Kosovës dhe rajonit.