Kryeministri i Kosovës, Albin Kurti, pas vizitës së tij në katër komunat veriore me shumicë serbe, ka thënë se e ardhmja e vendit tonë është e drejtë dhe përgjegjësi e të gjithëve.
Kurti ka shtuar se së bashku do të punohet për një të nesërme të ndritshme.
Ai ka thënë se gjatë vizitës së tij në veri e ka vizituar edhe vendin në Banjskë “ku ka rënë në pritë” Afrim Bunjaku, rreshteri policor i vrarë në atë sulm.
“Sot vizitova katër komunat veriore me shumicë serbe, përfshirë vendin ku u vra polici ynë Afrim Bunjaku nga forcat paramilitare serbe shtatorin e kaluar. E ardhmja e vendit tonë është e drejtë dhe përgjegjësi e të gjithëve dhe së bashku do të punojmë për një të nesërme të ndritshme”, ka shkruar Kurti në platformën X.
Today, I visited all 4 northern Serbian-majority municipalities, incl. the place where our policeman, Afrim Bunjaku, was killed by Serbian paramilitary forces last Sept. The future of our country is everyone’s right & responsibility, & together we will work for a bright tomorrow. pic.twitter.com/fX4twSa6To
— Albin Kurti (@albinkurti) April 3, 2024
Kryeministri Kurti gjatë vizitës në veri të vendit, ka deklaruar se është i nevojshëm nënshkrimi i Marrëveshjes Bazike në kuadër të dialogut me Serbinë, që të krijohet siguria ligjore dhe të fshihen të gjitha shkeljet e mëhershme.
Ndërsa, i pyetur nga mediat lidhur me deklaratat e zëdhënësit të BE-së, Peter Stano, se themelimi i Asociacionit të Komunave me shumicë serbe është kusht që duhet të zbatohet urgjentisht nga Kosova për të vazhduar progresin në rrugën evropiane, Kurti ka thënë se ajo çfarë duhet të zbatohet e nuk po respektohet është Marrëveshja Bazike e 27 shkurtit të vitit të kaluar.
Ai ka theksuar se përqendrimi duhet të jetë te Marrëveshja Bazike, e cila, sipas tij, “nuk duhet të shkelet”, por “duhet të respektohet dhe duhet të zbatohet”.