Kryeministri i Kosovës, Albin Kurti në replikën ndaj kryetarit të Lidhjes Demokratike të Kosovës(LDK), Lumir Abdixhiku e kritikoi atë për mungesë idesh.
Abdixhiku i ishte drejtuar Kurtit duke i thënë se heqja e armëve ilegale është kompetencë e Qeverisë së Kosovës dhe se nuk duhet të jetë pjesë e ndonjë marrëveshjeje me Serbinë.
Kurti më pas tha se Abdixhikun dhe deputetin tjetër të LDK-së, Avdullah Hotin i ka pasur bashkëpunëtorë në Qeverinë Kurti 1, por që sipas tij, asnjëherë nuk kanë dhënë ndonjë ide për ndërhyrje policore në veri.
Ai më tej ka ironizuar me deputetët e LDK-së duke thënë se nuk bëjnë as sa çereku i zëvendëskryeministrit Besnik Bislimi dhe ministrit të Financave, Hekuran Murati.
“Ju falënderoj që i dëgjuat 6 kushtet dhe që nuk dhatë mendimet për heqjen e ndonjërit me përjashtim të deputetit Abdixhikiu, i cili nuk e kuptoj a po sugjeron që të hyjmë me forcë në veri, a po e sugjeron këtë gjë? Deputetin Abdixhiku e kam pasur ministër, edhe deputetin Hoti zëvendëskryeministër, me ju tregu diçka, zëvendësi Bislimi dhe ministri Murati cilido prej këtyre, këta dy [Abdixhiku dhe Hoti] bashkë nuk janë as çereku i tyre.”, ka thënë Kurti.
Tutje, Kurti ka thënë se idetë e LDK-së “dirigjohen nga karrigia”.
Kurti iu referua vendimit të Gjykatës Kushtetuese në lidhje me Asociacionin e komunave me shumicë serbe, i cili kishte bërë të ditur se marrëveshja ishte në kundërshtim me 22 pika të frymës kushtetuese.