Kryeministri i Kosovës, Albin Kurti, priti në një takim lamtumirës Ambasadorin e Hungarisë në Prishtinë, Jozsef Bencze.
Në një komunikatë për media nga zyra e kryeministrit thuhet se Kurti e ka falënderuar ambasadorin Bencze për bashkëpunimin e deritanishëm.
“Në këtë takim të fundit gjatë mandatit të tij, Kurti e falënderoi ambasadorin Bencze për bashkëpunimin e deritanishëm dhe vlerësoi angazhimin e tij për thellimin dhe zgjerimin e marrëdhënieve bilaterale ndërmjet Kosovës dhe Hungarisë, si dhe për projektet e përbashkëta në fusha të ndryshme, veçanërisht në edukim, ku dhjetëra studentë nga Kosova po studiojnë në Hungari dhe në kulturë ku përmes marrëveshjeve të ndryshme po zgjerojmë bashkëpunimin”, thuhet në njoftim.
Duke shprehur mirënjohje për kontributin e tij për Republikën e Kosovës, Kurti i uroi ambasadorit Bencze suksese në angazhimet e tij të radhës.