Kryeministri i Kosovës, Albin Kurti, të enjten ka takuar ambasadorin e Mbretërisë së Bashkuar në Kosovë, Nicholas Abbott.
Siç ka njoftuar Zyra e Kryeministrit, Kurti dhe Abbott kanë diskutuar për zhvillimet aktuale, me theks situatën e fundit në veri të vendit, rëndësinë për deeskalim të plotë dhe rrugën përpara.
Në lidhje me këtë, kryeministri Kurti ka theksuar se sundimi i ligjit duhet të jetë parimi bazë për të ecur përpara.
“Vendosja e plotë e sundimit të ligjit në katër komunat në veri të Kosovës është e domosdoshme si për largimin e elementeve kriminale, ashtu edhe për një fushatë të hapur dhe fer para zgjedhjeve të lira e demokratike në të ardhmen”, ka deklaruar Kurti.
Po ashtu, Kurti ka falënderuar ambasadorin Abbott për angazhimin dhe bashkëpunimin e tij të vazhdueshëm në thellim dhe fuqizim të marrëdhënieve dypalëshe ndërmjet Republikës së Kosovës dhe Mbretërisë së Bashkuar.
Ndërsa, Abbott pas takimit me Kurtin të enjten, kishte shprehur shqetësimin e tij për situatën në veri të Kosovës dhe i ka bërë thirrje Qeverisë së Kosovës t’i dëgjojë partnerët ndërkombëtarë për të ndërmarrë hapa për t’i zbutur tensionet në veri.
Abbott ka kritikuar veprimet e kryetarëve komunalë në veri, duke thënë se ata nuk duhet të angazhohen në aktivitete të sigurisë dhe duhet të kryejnë detyrat e tyre në komunë.
Abbott ka thënë se ata duhet të punojnë në të mirën e qytetarëve të tyre dhe të kërkojnë më shumë bashkëpunim me agjencitë e sigurisë.
Gjithashtu, Kurti, mbrëmjen e së enjtes kishte zhvilluar një bisedë telefonike me sekretarin për Punë të Jashtme të Mbretërisë së Bashkuar, James Cleverly, me të cilin, ka përsëritur të njëjtën deklaratë si me ambasadorin Abbott.
Për sa i takon rrugës përpara drejt deeskalimit të plotë, Kurti në bisedë me Cleverly ka ritheksuar se sundimi i ligjit duhet të jetë hapi dhe parimi bazë.