Kryeministri i Kosovës, Albin Kurti, ka vizituar Shoqatën e ish-të burgosurve politikë në 42-vjetorin e demonstratave të vitit 1981.
Kurti është mirëpritur nga kryetari i shoqatës, Shefik Sadiku dhe anëtarë të kryesisë së kësaj shoqate.
Në këtë përvjetor të demonstratave që shënuan fillimin e një procesi që çoi deri në zhbërjen e Jugosllavisë e deri në çlirimin e vendit, ata kujtuan e rikujtuan ngjarjet dhe rrugën që ato trasuan.
“Demonstratat e vitit 1981, që nisën si protestat spontane të studentëve për kushte të dinjitetshme dhe trajtim të barabartë, shpejt morën mbështetjen edhe të punëtorëve dhe mbarë popullit, që së bashku kërkonin liri, drejtësi, të drejta, Republikë e Vetëvendosje”, thuhet në njoftimin e Kryeministrisë.
Në këtë vizitë, kreu i ekzekutivit ka theksuar se forca, guximi dhe organizimi i studentëve, rinisë dhe punëtorëve “atëbotë përballë shtypjes së dhunshme dhe padrejtësisë sistematike janë shembull i vetëdijes që duhet ndjekur për çdo ditë dhe përkujtuar për çdo vit”.