Shefja e Grupit Parlamentar të Lëvizjes Vetëvendosjes, Mimosa Kusari-Lila, ka thënë se Kosova i ka plotësuar të gjitha kushtet për liberalizimin e vizave për qytetarët e saj.
Në një deklaratë për media pas mbledhjes së Kryesisë, Kusari-Lila tha se në mënyrë të pashmangshme, Kosova gjendet në një udhëtim njëdrejtimësh.
“Nuk ka dyshime të themi që Kosova i ka plotësuar të gjitha kushtet për liberalizimin e vizave për qytetarët e saj, dhe tashme duhet të jemi bashkëpunues dhe natyrisht të fokusohemi në ato punë dhe ato angazhime të cilat në presin këtu në Kosovë”, ka deklaruar Kusari.
Krahas kësaj, Kusari-Lila ka bërë të ditur se në mbledhjen e Kryesisë së Kuvendit të paralajmëruar për në orën 10:00, nuk ka pasur kuorum.
Ndonëse nuk filloi në aspektin formal, ajo ka bërë të ditur se bisedat me shefat e grupeve parlamentare kanë filluar lidhur me dinamikën e seancës të së premtes. Ndër të tjera, bëhet e ditur se ata janë dakorduar që me mocion, në fillim të seancës së sotme, 5 marrëveshjet ndërkombëtare, të cilat u shtynë javën e kaluar, të përfshihen në agjendë.
“Pesë marrëveshjet janë në mes të Kosovës dhe Bashkimit Evropian dhe kanë të bëjnë me marrëveshjen IPA dhe të pestat do të mbështetën edhe nga partitë opozitare. U dakorduam po ashtu që të enjten e radhës të kemi një seancë me trajtimin e të gjitha pikave të papërmbyllura nga seancat e deritashme”, deklaroi Kusari-Lila.
Në mbledhjen e mbyllur, të mbajtur të enjten në Këshillin e Bashkimit Evropian, është propozuar që procesi i liberalizimit të vizave për Kosovën të lidhet me funksionalizimin e sistemit për siguri në Evropë, ETIAS
Një kërkesë e tillë erdhi nga Franca, të cilën, e kanë mbështetur edhe nga Belgjika, Suedia, Holanda dhe Spanja.
Qëllimi kryesor i ETIAS është që të identifikojë kërcënimet ose rreziqet e mundshme që lidhen me vizitorët që udhëtojnë në cilindo nga vendet e zonës Shengen. Autorizimi i këtij programi do të jetë i nevojshëm për të hyrë në një vend anëtar të Shengenit nga ajri, toka ose deti.