Me kërkesën e 40 deputetëve, Kuvendi i Kosovës këtë të enjte pritet të mbajë seancë të jashtëzakonshme në lidhje me themelimin e komisionit hetimor për kontratat njëburimore të nënshkruara gjatë qeverisjes Kurti.
Kërkesa për këtë seancë është iniciuar nga Partia Demokratike e Kosovës (PDK).
Kjo seancë pritet të fillojë në ora 10:00.
PDK kërkon themelimin e Komisionit Hetimor për kontratat njëburimore
Abelard Tahiri, shef i Grupit Parlamentar të PDK-së ka bërë të ditur se ka kërkuar themelimin e komisionit hetimor parlamentar për kontratat njëburimore.
“Sot dorëzova kërkesën për seancë të jashtëzakonshme në emër të 40 deputetëve të Kuvendit për të enjten e kësaj jave. Kjo seancë do të shqyrtojë propozimin për themelimin e komisionit hetimor parlamentar për kontratat njëburimore që grupi ynë parlamentar e ka parashtruar të premten e javës së shkuar,” ka deklaruar Tahiri.
Ai ka shkruar në Facebook se Qeveria Kurti i ka keqpërdorur mbi 150 milionë euro nëpërmjet kontratave të tilla, duke shtuar se këto “janë burim i korrupsionit”.
Ndërsa, në agjendë është edhe mbajtja e një seancë për shqyrtimin e pikave të papërfunduar.
Në rend të ditës është edhe votimi në lexim të dytë i Projektligjit për shëndetin riprodhues dhe fertilizim të asistuar mjekësor.
Po ashtu, më 11 prill do të mbahet një seancë e veçantë, në përvjetorin e 25-të të Betejës së Kosharës.