Emisari i Bashkimit Evropian për dialogun Kosovë-Serbi, Miroslav Lajçak, gjatë takimit të tij me presidentin e Serbisë, Aleksandër Vuçiq, ka treguar se kanë diskutuar lidhur me çështjen e dialogut Kosovë-Serbi dhe takimin e radhës të nivelit të lartë.
Ai përmes një postimi në llogarinë e tij në Twitter, ka thënë se gjatë këtij takimi kryesisht temë diskutimi ishin çështjet aktuale.
“Sot në Beograd pata një diskutim të thellë me presidentin serb, Aleksandër Vuçiq. Biseduam në lidhje me çështjet aktualisht në agjendë dhe rrugën përpara në dialog, duke përfshirë edhe takimin e ardhshëm të nivelit të lartë”, ka shkruar Lajçak.
Today in Belgrade, I had an in-depth discussion with @predsednikrs @avucic about the issues currently on the agenda and the way forward in the Dialogue, including the next High-level meeting. pic.twitter.com/2BVp34CFnO
— Miroslav Lajčák (@MiroslavLajcak) April 20, 2022
Ndërkohë, zëvendëskryeministri i Kosovës, Besnik Bislimi dhe përfaqësuesi i palës serbe, Petar Petkoviç, do të takohen në kuadër të diskutimit mbi marrëveshjen për targat.
Kurse zëdhënësi i Bashkimit Evropian, Peter Stano, ka thënë të martën, në 9 vjetorin e nënshkrimit të Marrëveshjes së Brukselit, se tani është koha për të ecur përpara dhe për të “përfunduar me sukses” procesin e dialogut për normalizimin e marrëdhënieve ndërmjet Kosovës dhe Serbisë.
Ai tha se me nënshkrimin e Marrëveshjes, Kosova dhe Serbia zyrtar kanë marrë obligime të rëndësishme ndërkombëtare dhe ka theksuar se të dyja palët duhet të zbatojnë plotësisht gjithçka që është rënë dakord.
Ndërkaq, më 21 prill do të skadojë ujdia e arritur në Bruksel.
Marrëveshja e arritur në Bruksel më 30 shtator përmban tri pika
Në pikën një, thuhet se “Forcat e njësisë speciale të Policisë së Kosovës të vendosura në Jarinjë e Bërnjak do të largohen njëkohësisht me bllokadat në rrugë, më 2 tetor në orën 8:00 dhe gjithë kjo tërheqje do të përfundojë, maksimalisht, deri në orën 16:00. KFOR-i do të vendoset në Jarinjë e Bërnjak para se të nisë largimi i sinkronizuar dhe do të qëndrojë për dy javë për të mbajtur ambient të sigurt dhe lëvizje të lirë”.
Në pikën dy thuhet se “nga 4 tetori, do të nisë së zbatuari regjimi i letrave ngjitëse, siç është rënë dakord në kuadër të dialogut të lehtësuar nga BE, si një masë e përkohshme derisa të arrihet një zgjidhje e përhershme”.
Në pikën e tretë të marrëveshjes thuhet se “do të krijohet një grup pune i përfaqësuesve të partive të BE-së, Beogradit dhe Prishtinës, dhe i kryesuar nga BE-ja për të gjetur një zgjidhje të përhershme për çështjen e targave, bazuar në standardet dhe praktikat e BE -së”.
“Takimi i parë i grupit punues do të mbahet më 21 tetor 2021 në Bruksel. Brenda gjashtë muajve, prej nisjes së takimit të parë, i ashtuquajtur Grup Punues, do të prezantojë gjetjet për një zgjidhje të përhershme në formatin e dialogut të nivelit të lartë duke vendosur etiketat ngjitëse në targat e automjetit të tij”.