Një person është lënduar, ndërsa tre të tjerë kanë pësuar asfiksim nga zjarri i sotëm që shpërtheu në një fabrikë në Tetovë, ka bërë të ditur Gazmend Ibishi, përgjegjës nga Ndihma e Shpejtë në Tetovë, gjersa ka theksuar se të gjithë ata janë në gjendje stabile dhe jashtë rrezikut për jetë.
“Deri tani kemi pasur tre raste me asfiksim, që kanë humbur pak oksigjenin në terren. Nuk kanë qenë në gjendje të rëndë, vetëm i kemi transportuar deri në repartin e internos, kanë marrë ndihmë”, ka deklaruar ai.
Kryetari i Këshillit të Komunës së Tetovës, Besar Durmishi ka thënë se zjarri ka kapluar vetëm një fabrikë e cila ka prodhuar material ndërtimor.
Ai ka bërë të ditur se zjarri ka filluar rreth orës 9:00 të mëngjesit dhe ndërkohë, zjarrfikësit e Tetovës janë duke u ndihmuar nga njësitë e Gostivarit, Shkupit dhe helikopterët e ushtrisë për shuarjen e zjarrit.
Përmes Radio Dukagjinit, Durmishi ka bërë apel që qytetarët të qëndrojnë në shtëpi, ngase nuk dinë se çfarë kimikatesh janë djegur dhe si mund të ndikojë tymi te qytetarët. Njëherësh, ai u thotë qytetarëve të vendosin maskat për çështje sigurie.
“Fatmirësisht në zonën përreth fabrikave nuk ka banorë. Kemi vetëm dëme materiale”, ka thënë Durmishi për Radio Dukagjinin.
Gjithashtu, Tetova ka ndaluar procesin mësimor si shkak i këtij incidenti.
Durmishi ka bërë të ditur për Radio Dukagjinin se do të flasë më detajisht për rrethanat e zjarrëvënies pas inspektimit të plotë të policisë së vendit.
Drejtori i Qendrës për Menaxhim me Kriza, Stojançe Angelov, ka bërë të ditur se helikopteri i cili ka arritur tashmë në Tetovë, do të tentojë të pengojë përhapjen e zjarrit në pjesën ku ruhen lëndët shpërthyese.