Liderët opozitarë kanë dënuar atentatin ndaj ish-presidentit të ShBA-së, Donald Trump.
Edhe kryetari i Lidhjes Demokratike të Kosovës, (LDK) Lumir Abdixhiku është shprehur i tronditur nga sulmi kundër ish-presidentit amerikan, Donald Trump.
“Të tronditur nga akti i sotëm i dhunës ndaj ish-Presidentit të Shteteve të Bashkuara të Amerikës, z. Donald Trump, unë dhe Lidhja Demokratike e Kosovës shprehim indinjatën dhe zemërimin ndaj një veprimi të tillë”, ka shkruar Abdixhiku.
Në emër të LDK-së, Abdixhiku i ka uruar shërim të shpejtë Trumpit dhe kthim në aktivitetet e tij të përditëshme.
”Njëkohësisht, i qëndrojmë afër në lutje z. Trump dhe familjes së tij si dhe i urojmë shërim të shpejt dhe kthim në aktivitetet e tija të përditëshme, në të mirë të përparimit të demokracisë. Aktet e tilla duhet të na shërbejnë si moment reflektimi dhe zotimi për luftimin e dhunës të cilësdo natyre ajo qoftë dhe forcimin e bashkëpunimit dhe lirive, si themele për zhvillimin e demokracisë”, ka vijuar ai.
Po ashtu edhe kryetari i Aleancës për Ardhmërinë e Kosovës (AAK), Ramush Haradinaj e ka dënuar sulmin ndaj Trumpit duke thënë se aktet e dhunshme janë një pengesë për realizimin e demokracive, të papranueshme dhe si të tilla duhet të ndalohen.
Haradinaj i ka uruar shërim të shpejtë Trumpit.
“E dënoj fuqishëm sulmin ndaj Presidentit Trump! Aktet e dhunshme janë një pengesë për realizimin e demokracive, janë të papranueshme dhe duhet të ndalohen. ShBA-ja është një shembull për demokracitë në të gjithë botën dhe së bashku ne përparojmë përmes diskursit paqësor të vendeve tona dhe respektit për sundimin e ligjit”, ka shkruar Haradinaj.