Një ballafaqim jo i këndshëm ndodhi pak ditë më parë mes presidentës Vjosa Osmani e kryeministrit Albin Kurti.
“Mollë sherri”, për krisje të raporteve u tha se është ligji për zgjedhjet e përgjithshme, i cili ka kaluar në lexim të parë në Kuvendin e Kosovës.
E ky ligj duket se fatin do ta ketë në Kushtetuese.
Kështu është i bindur Avokati I Popullit i cili ka treguar se ky ligj nuk ka kaluar nëpër konsultime publike dhe si i tillë ka përjashtuar edhe ligjin për barazi gjinore që thotë se listat zgjedhore duhet të përfaqësohen 50 me 50.
“Të them të drejtën, unë nuk kam arritë me i dëgju çfarë kanë bisedu dhe për Avokatin e Popullit është pak e rëndësishme ajo çfarë diskutojnë të tjerët, e rëndësishme është ajo çfarë unë krijoj si bindje dhe kur konstatoj që një e drejtë ose një çështje duhet t’i nënshtrohet vlerësimit të përpuethshmërisë së saj me Kushtetutën, unë besoj se kjo do të ndodhë”, ka thënë Naim Qelaj.
Qelaj, para katër ditësh i është drejtuar Presidentes Osmani me një letër duke bërë thirrje që të mund të ndryshohen pikat që supozohet se janë në kundërshtim me Kushtetutën e Republikës së Kosovës.
Në këtë letër të njoftuar janë edhe kryekuvendari, Glauk Konjufca edhe kryeministri Albin Kurti.
“Pavarësisht kësaj, ne i kemi dhënë mundësi Qeverisë dhe Kuvendit që deri në afatin për ushtrimin e kërkesës në Gjykatën Kushtetuese të bëhet amandamentimi i ligjit, gjë që neve jo vetëm që kish me na e heqë nga lista një punë, por edhe kish me qenë vërtetë akt i një vullneti të mirë politik i cili do të përkrahej nga ana ime dhe do të ishte shumë inkurajuese”, ka vijuar Qelaj.
E pikërisht për këtë Ligj dhe për të diskutar tutje, nga Kabineti i Presidentes Osmani për Dukagjinin kanë thënë se gjatë javës do të zhvillohet një takim me Avokatin e Popullit.
Ndërkohë nga kabineti i kreut të legjislativit dhe atij të ekzekutivit nuk është thënë asnjë fjalë në lidhje me këtë cështje.