Lulzim Rafuna është zgjedhur kryetar i Odës Ekonomike të Kosovës, ndërsa kryesues i Kuvendit është zgjedhur Sami Mazreku nga Byroja e Sigurimeve.
Kundërkandidatë të Rafunës ishin, Ruzhdi Kurtishaj dhe Erëza Vela, kryetar i deritanishëm ishte Berat Rukiqi.
Kundërkandidati, Ruzhdi Kurtishaj përmes një postimi në rrjetin social facebook ka uruar kryetarin e ri të Odës Ekonomike, Lulzim Rafunën, poashtu Kurtishaj është shprehur falenderues ndaj të gjithë atyre që e kanë votuar dhe atyre që nuk e kanë votuar.
“Dua të falënderoj të gjithë delegatët, ata që më votuan dhe ata që nuk më votuan për pjesëmarrjen e tyre në zgjedhjet e OEK-ut. Urime Kryetarit të ri të Oda Ekonomike e Kosovës z. Lulzim Rafuna. Suksese organeve të reja të Odës Ekonomike të Kosovës!” shkruhet në postimin e tij.
Ndërkaq, Oda Ekonomike Kosovës (OEK) është organizatë e themeluar në vitin 1962 nga Kuvendi i Kosovës.
OEK-u është organizatë e pavarur, jopolitike dhe jofitimprurëse. Është institucioni i vetëm i biznesit i themeluar me ligj dhe veprimtaria e OEK-ut zhvillohet mbi bazën e këtij Ligji (Ligji mbi Odën Ekonomike të Kosovës 2004/7) i miratuar nga Kuvendi i Kosovës, raporton ekonomiaonline.
Në mision, Oda Ekonomike e ka analizimin e gjendjes ekonomike në vend dhe propozimin e formave të reja e të avancuara të biznesit vendor.
Erëza Vela, kandidatja e parë femër për kryetare të Odës Ekonomike
Erëza Vela, ekonomistja e njohur poashtu ka kandiduar për kryetare të Odës Ekonomike të Kosovës
Për herë të parë, një grua ështe futur në garën e kandidimit për Kryetare të Odës Ekonomike, Erëza Vela është ekonomistja e njohur e cila fokus e ka që të jetë zë i përfaqësuesëve të biznesit në Kosovë.
Vela, në bashkëpunim me biznese dhe ekspertë ekonomikë e ka përpiluar edhe planin për 4 vjetët e ardhshme në Odën Ekonomike të Kosovës (OEK).
Erëza Vela është ndërmarrëse e suksesshme me ekspertizë në sektorin privat.
Vela ka treguar se është takuar me përfaqësues të donatorëve, përfaqësues të qeverisë, deputetë dhe shumë akterë të tjerë relevantë për ta diskutuar kandidaturën e saj.
“Plani im në një fjali është: t’ia hapim dyert Odës karshi secilit akter e partner dhe ta pozicionojmë atë si oda kryesore ekonomike në vend dhe zëri më i fuqishëm i biznesit në zhvillim. Kur ta arrijmë këtë, OEK do të shndërrohet në atë që duhet të jetë: institucioni kryesor në zhvillimin ekonomik të Kosoves,” ka shkruar Vela.
Rafuna zgjidhje e gabuar?
Erëza Vela, kandidatja për kryetare të Odës Ekonomike e ka cilësuar se zgjidhja e kryetarit të ri të Odës Ekonomike, pra Lulzim Rafuna ka qenë zgjidhje e gabuar.
“Në humbje e në fitore, unë fokusohem ta dhë 100% timen,” ka shkruar Vela.
Preferencë e saj shihet të jetë humbja me kokën lartë dhe me profesionalizëm, ku fitimet me mashtrime, Vela ka shkruar se nuk i preferon.
Sipas saj, armë kryesore, kandidimi i saj ka qenë përvoja profesionale, përvoja me biznes, përvoja akademike si dhe plani super vizionar, ajo ka shtuar se bizneset e Odës Ekonomike nuk i kanë pasur këto kritere për të vlerësuar kryetarin e Odës Ekonomike.
“Ata sot votuan parti politike, jo individ. Koha ka me e deshmu qe Lulzim Rafuna ka qene zgjidhja e gabuar,” ka shkruar Vela.