Sami Lushtaku nga radhët e Partisë Demokratike të Kosovës ka krahasuar videon e publikuar nga Lëvizja Vetëvendosje me një “spot” që veç në kohën e ish-presidentit serb, Millosheviq do e shihte.
Në një lidhje direkte në Debat Plus, Lushtaku ka thënë se i vie keq nga ish-krerët e UÇK-së të cilët aktualisht po mbahen në paraburgim në Hagë.
“Më erdhi keq nga ish-krerët e UÇK-së që janë në Hagë, atje kur edhe familjet dhe edhe qytetarët presin që një kryeministër të interesohet se si po vazhdon burgimi i tyre, ai e publikon një spot që veç në kohën e Millosheviqit e kam parë”, është deklaruar Lushtaku.
“Ky nuk është Kurti, ky është Kurtoviq për mua”, ka thënë ai gjersa ka theksuar se Kryeministri Kurti ka futur një diskurs të urrejtjes në mes qytetarëve, gjë e cila sipas tij nuk ka ndodhur më përpara në Kosovë.
I pyetur se nëse a ka ndonjë inciativë të tijën për të rrëzuar Kryeministrin e Kosovës, Albin Kurti, Lushtaku ka thënë se atë nuk mund t’a rrëzoj as ai dhe as PDK ngase Kurti ka 51 për qind të votave.
Një reagim i tillë i Lushtakut vie pas publikimit të një videoje nga ana e Lëvizjes Vetëvendosje, video në të cilën kritikonte opozitën e dikurshme për keqqeverisjen në vend. Në mes fotove të figurave politike, bënte pjesë edhe Lushtaku.