Lëvizja Vetëvendosje ka propozuar nënkryetarin e saj, Glauk Konjufcën, për mandatar të ri për formimin e Qeverisë së Kosovës.
Vendimi u mor gjatë mbledhjes së Këshillit të Përgjithshëm të partisë, të mbajtur të martën në Prishtinë.
Kryetari i LVV-së, Albin Kurti, tha se për këtë vendim është dakorduar vetë me Konjufcën.
“Këtë propozim e bëj për shkak të besimit të madh që kam për Konjufcën, por edhe për shkak që të mos bëhen zgjedhje tjera. Unë marr vendin e Glaukut, e ai timin, siç jemi dakorduar bashkë mbrëmë”, deklaroi Kurti, duke iu referuar postit të zëvendëskryeministrit dhe ministrit të Jashtëm e Diasporës, që më herët ishte caktuar për Konjufcën në ekzekutivin e propozuar më 26 tetor — i cili nuk mori mbështetjen e nevojshme në Kuvend.
Kurti ka theksuar se ky propozim synon shmangien e dy palë zgjedhjeve brenda një periudhe të shkurtër dhe sigurimin e miratimit të buxhetit për vitin 2026.
“Le ta votojë opozita një qeveri të udhëhequr nga Glauku, në mënyrë që të procedohet buxheti i shtetit nga një qeveri fuqiplotë”, ka deklaruar mes tjerash Kurti.
