Anëtari i Kryesisë së Lidhjes Demokratike të Kosovës (LDK), Shkëmb Manaj, ka thënë se është i bindur se edhe deputeti i kësaj partie, Avdullah Hoti, do ta votojë kandidatin për president, Bekim Sejdiu.
Kjo deklaratë e Manajt vjen pasi Hoti ka shprehur publikisht kundërshtimin e tij ndaj kandidaturës së Sejdiut për president.
I pyetur për deklarimet e Hotit dhe nëse mund të ketë masa ndaj deputetëve që nuk e votojnë Sejdiun, Manaj tha se është i bindur se të gjithë deputetët e LDK-së do të marrin pjesë në seancën për zgjedhjen e presidentit.
“Unë jam i bindur se të gjithë deputetët do të marrin pjesë në seancë për zgjedhjen e presidentit. Grupi parlamentar është unik, të gjithë deputetët janë në krye të detyrës. Unë jam i bindur se edhe zoti Avdullah Hoti do të jetë për zgjedhjen e presidentit të Kosovës”, ka deklaruar Manaj.
Ai ka vlerësuar se Bekim Sejdiu është figura e duhur për këtë post, duke thënë se pret që të gjitha organet e LDK-së ta mbështesin kandidaturën e tij.
“Jam i bindur se të gjitha organet e LDK-së do të jenë për kandidaturën e tij”, ka thënë Manaj.
LVV dhe LDK kanë arritur marrëveshje për mbështetjen e Bekim Sejdiut si kandidat të përbashkët për president të Kosovës.