Bilanci i viktimave nga përmbytjet dhe rrëshqitjet e dheut në ishullin Sumatra të Indonezisë është rritur ndjeshëm, duke arritur në 442 të vdekur, njoftuan autoritetet lokale.
Më herët gjatë së dielës, shifra kishte kaluar 300, ndërsa operacionet e evakuimit po vijojnë në kushte tepër të vështira.
Përmbytjet masive kanë shkaktuar ndërprerje të rrugëve kryesore, ndërsa energjia elektrike dhe interneti funksionojnë vetëm pjesërisht.
Shirat monsunorë të fuqizuar nga stuhi tropikale kanë goditur rëndë gjithë Azinë Juglindore, ku mijëra njerëz janë prekur dhe qindra të tjerë kanë humbur jetën edhe në Malajzi dhe Tajlandë.
Në Tajlandë, autoritetet raportojnë 170 të vdekur, ndërsa në Malajzi, në shtetin verior Perlis, janë regjistruar dy viktima. Ndërkohë, Sri Lanka po përballet me mot ekstrem nga cikloni Ditwah, me së paku 193 të vdekur dhe mbi 200 të zhdukur.
Një stuhi tropikale jashtëzakonisht e rrallë, Cikloni Senyar, shkaktoi rrëshqitje të mëdha dhe përmbytje shkatërrimtare në Indonezi. Qindra shtëpi u morën nga rrjedha, ndërsa mijëra ndërtesa u zhytën nën ujë.
“Rryma ishte shumë e shpejtë, për disa sekonda u fut në rrugë dhe në shtëpi,” tha banorja e provincës Aceh, Arini Amalia, për BBC. Ajo u strehuan në një zonë më të lartë, por një ditë më vonë në kthim gjeti shtëpinë e zhdukur: “E ka përpirë uji.”
Banorë të tjerë treguan se janë marrë nga rrjedha dhe kanë mbijetuar duke u kapur pas çfarëdo objekti që mundën.
“Gjatë përmbytjes, gjithçka u zhduk,” tha një banor i Bireuen për Reuters. “Dëshiroja të shpëtoja rrobat, por shtëpia u shemb.”
Reshjet e dendura kanë penguar operacionet e kërkim-shpëtimit, ndërsa agjencia e menaxhimit të katastrofave thotë se dhjetëra mijëra persona janë evakuuar, por qindra të tjerë mbeten të bllokuar.
Në zonën më të goditur, Tapanuli, banorët thuhet se kanë plaçkitur dyqane në kërkim të ushqimit.
Tajlanda raportoi përmbytjet më të rënda në një dekadë
Provinca jugore Songkhla në Tajlandë u përmbyt nga ujë deri në 3 metra, duke shkaktuar të paktën 145 viktima. Në total, përmbytjet kanë prekur 3.8 milionë njerëz në dhjetë provinca. Qyteti Hat Yai shënoi 335 mm shi brenda një dite, sasia më e lartë në 300 vitet e fundit.
Në një spital në Hat Yai, morgu u mbingarkua dhe trupat u transferuan në kamionë frigoriferikë, raportoi AFP. Banorët thonë se kanë qëndruar për ditë të tëra të bllokuar pa ndihmë.
Qeveria tajlandeze ka premtuar dëmshpërblime deri në 2 milionë bath (rreth 62 mijë dollarë) për familjet e viktimave.
Malajzia dhe Sri Lanka në gjendje emergjente
Në Malajzi, përmbytjet në shtetin Perlis kanë detyruar dhjetëra mijëra njerëz të largohen nga shtëpitë e tyre dhe të strehohen në qendra emergjente.
Sri Lanka po përballet gjithashtu me një nga katastrofat më të rënda të motit në vitet e fundit. Më shumë se 15 mijë shtëpi janë shkatërruar dhe 78 mijë persona janë zhvendosur, ndërsa një e treta e vendit ka mbetur pa energji elektrike dhe ujë të pijshëm. Qeveria ka shpallur gjendjen e emergjencës./BBC