Ministri i Mbrojtjes, Armend Mehaj ka njoftuar se ka pritur në takim ambasadorin francez në Kosovë, Olivier Guérot me delegacionin e tij.
Ministri Mehaj ka thënë se me ambasadorin Guérot kanë diskutuar rreth nivelit të bashkëpunimit bilateral.
“Me fokus për mbështetjen më të madhe nga Franca si vend i rëndësishëm i NATO-s në proceset zhvillimore të FSK-së si dhe ato integruese në organizatat ndërkombëtare të sigurisë, dhe Programin e Partneritetit për Paqe si rrugë drejt anëtarësimit në NATO”, ka vazhduar ministri Mehaj.
Tutje, Mehaj ka theksuar se ambasadori Guérot ka shprehur gatishmërinë e tij për të adresuar këto çështje te autoritetet përgjegjëse franceze.
Mes të tjerash, ai ka shtuar se ambasadori Guérot ka konfirmuar se Franca e mbështet Kosovën në perspektivën zhvillimore dhe është e përkushtuar për paqen dhe sigurinë, duke vlerësuar edhe rolin e madh të Kosovës në këtë aspekt.