Ministri i Mbrojtjes, Armend Mehaj ka thënë se komandanti legjendar, Adem Jashari është simbol i Epopesë së UÇK-së.
Përmes një postimi në Facebook, Mehaj ka shkruar se Ademi është qëndresa e pashembullt e gjithë familjes Jashari.
“Ademi i lindur më 28 nëntor e i rënë më 7 mars, me jetën dhe me vdekjen e tij, u dha edhe më tepër kuptim këtyre dy datave të shenjta. U lind për të nderuar flamurin e atdheun, e ra më 7 mars, për të mbetur përgjithmonë mësuesi i kombit”, ka shkruar Mehaj.
Ministri Mehaj, ndër të tjera, ka thënë se Jashari u bë zemra e përjetshme e popullit të Kosovës, e cila rreh pa u ndalur, për barazi e drejtësi, për pavarësi e jetesë me nder.
“Prekazi heroik çdo mars na rikujton obligimin që kemi për të përmbushur amanetin e të parëve, e të ndërtojmë të ardhmen e brezave të rinj”, ka vijuar ai.