Lionel Messi ka shënuar golin e tretë në Katar, për t’i dhënë epërsinë Argjentinës ndaj Kombëtares së Australisë.
Tashmë rezultati është 1:0 për argjentinasit, të cilët janë duke dominuar në ndeshjen e dytë të fazës eliminuese të Kampionatit Botëror 2022.
Goli i tretë në Katar nga Messi u shënua në minutën e 35-të, pavarësisht hapësirës së ngushtë, ai gjeti hapësirën e duhur për të goditur me këmbën e majtë rrjetën e Australisë.
Messi ka shënuar tetë gola në 22 ndeshje në Kupën e Botës FIFA, duke përfshirë pesë edicione (2006, 2010, 2014, 2018 dhe 2022).
Shifrat e vendosin atë në të njëjtin nivel me të ndjerin Maradona, i cili shënoi tetë gola në 21 ndeshje në Kupën e Botës të futbollit.
Ai tashmë është duke luajtur ndeshjen e 1000-të në karrierë kundër Australisë.
Po ashtu, Messi krijoi pesë raste në fitoren 2-0 të Argjentinës ndaj Polonisë, duke e çuar numrin e tij në 63 në Kupën e Botës në përgjithësi.
Ndërsa, që nga viti 1966, i vetmi lojtar që ka krijuar më shumë shanse në Kupën e Botës është argjentinasi Diego Maradona me 67 shanse.
Fituesi i kësaj ndeshje do të luajë kundër Holandës të premten.