Meta po teston një shërbim të ri abonimi që do t’i lejojë përdoruesit e Facebook dhe Instagram të paguajnë për një llogari të verifikuar.
Shefi ekzekutiv i Meta, Mark Zuckerberg, ka njoftuar Meta Verified në llogaritë e tij në rrjetet sociale. Testimi do të fillojë në Zelandën e Re dhe Australi këtë javë dhe do të shtrihet në vendet e tjera së shpejti, u shpreh ai.
Për 11,99 dollarë në muaj në ueb ose 14,99 dollarë në muaj në sistemet operative Apple dhe Android, Meta do të përdorë një identifikim qeveritar për të verifikuar llogarinë e një përdoruesi dhe për t’i dhënë llogarisë një distinktiv blu. Ndërsa, më parë, stemat blu të Metës ishin falas dhe të rezervuara për personazhe apo biznese të njohura publike.
Abonentët do të kenë edhe mbrojtje shtesë kundër imitimit të llogarisë dhe akses të drejtpërdrejtë në mbështetjen e klientit, ka shtuar Meta.
“Kjo veçori e re ka të bëjë me rritjen e autenticitetit dhe sigurisë në të gjitha shërbimet tona”, ka vijuar Zuckerberg në mesazhin e tij.
Meta tha se personazhet publike dhe të tjerë që ishin verifikuar më parë nuk do të preken nga ndryshimi. Meta Verified u drejtohet ndikuesve dhe të tjerëve që përdorin mediat sociale për biznesin e tyre, por nuk janë figura publike të shquara.
Ndryshe, Meta po merr një faqe nga libri i lojërave të Twitter për të nisur një shërbim abonimi. Në fund të vitit të kaluar, Twitter filloi t’i tarifonte përdoruesit 8 dollarë në muaj për Twitter Blue, i cili verifikon llogarinë e tyre me një çek blu.
Të shtunën, Twitter u bë një hap më tej, duke njoftuar se përdoruesit e Twitter do të humbnin aftësinë e tyre për të siguruar llogaritë e tyre me vërtetim me dy faktorë, nëse nuk paguajnë abonimin mujor prej 8 dollarësh në Twitter Blue.
Kompanitë e mediave sociale janë përpjekur të gjejnë burime të reja të ardhurash, ndërsa reklamimi në internet ngadalësohet. Në fillim të këtij muaji, Meta ka njoftuar për rënien e të ardhurave pavarësisht rritjes së përdoruesve.
Meta ka shtuar se po pushonte nga puna 11,000 punëtorë, ose 13% të fuqisë së saj punëtore, në nëntor.