Ministri i Jashtëm i Ukrainës, Dmytro Kuleba, ka thënë se sulmet ruse të së martës tregojnë se çfarë mendon Rusia për çdo negociatë të mundshme të paqes në mes dy vendeve.
Përmes një postimi në Twitter, Kuleba ka thënë se terrori rus mund të ndalet vetëm me forcën e armëve dhe parimeve ukrainase dhe se nuk duhet propozuar që Ukraina të pranojë ultimatumet ruse.
“Raketat ruse po vrasin njerëz dhe po shkatërrojnë infrastrukturën në të gjithë Ukrainën tani. Kjo është ajo që Rusia ka për të thënë për çështjen e bisedimeve të paqes. Mos i propozoni Ukrainës të pranojë ultimatumet ruse! Ky terror mund të ndalet vetëm me forcën e armëve dhe parimeve tona”, ka deklaruar Kuleba në Twitter, transmeton CNN.
Russian missiles are killing people and ruining infrastructure across Ukraine right now. This is what Russia has to say on the issue of peace talks. Stop proposing Ukraine to accept Russian ultimatums! This terror can only be stopped with the strength of our weapons & principles.
— Dmytro Kuleba (@DmytroKuleba) November 15, 2022
Kryeqyteti i Ukrainës është sulmuar me raketa këtë të martë, ka thënë kryebashkiaku i qytetit, derisa në anën tjetër liderët botërorë janë mbledhur në samitin e G20, për ta dënuar pushtimin rus të Ukrainës, raporton BBC.
“Rusia po i përgjigjet fjalimit të fuqishëm të Zelenskyy në G20 me një sulm të ri raketor. A mendon dikush seriozisht se Kremlini dëshiron vërtet paqe?”, ka shkruar Andrii Yermak, kreu i Zyrës së Presidentit të Ukrainës.
Dy ndërtesa banimi në lagjen Pechersk janë në mesin e atyre që janë goditur, sipas kryetarit të bashkisë së qytetit, Vitali Klitschko.
Ky shënon sulmin e parë të tillë në më shumë se një javë, kohë gjatë së cilës Rusia tërhoqi trupat nga Kherson.