Ministrja e Jashtme dhe Diasporës, Donika Gërvalla, në një konferencë për media ka bërë të ditur se nga data 27 korrik e deri më shtatë gusht, do të mbahet një organizim për bashkëatdhetarët që do të quhet “Karvani i Diasporës”.
Ministrja Gërvalla tha se me këto lloj organizimesh tentojnë që të rinjtë që kanë lindur e janë rritur jashtë vendit, ta njohin sa më mirë Kosovën.
“Programi i dytë i cili është fillimisht një program pilot, është një program që ka të bëjë me diplomacinë publike. Është një interesim i natyrshëm i Republikës që të rinjtë që janë lindur e rritur në diasporë ta njohin Kosovën përtej lidhjeve familjare”, ka thënë Gërvalla.
Gërvalla bëri të ditur se programi “lidershipi” është i dizajnuar të zgjasë gjashtë muaj.
“Si Ministri e Punëve të Jashtme në kuadër të Karavanit është pikërisht programi i diplomacisë qytetare. Është program lidershipi i cili është i dizajnuar që të zgjasë 6 muaj. Ky program është si pjesë e ndërlidhjes së strategjisë për diplomaci qytetare. Ftoj të gjithë të rinjtë dhe të rejat që të jenë pjesë e programit dhe të presim një ndërlidhje të tyre”, është shprehur ajo.
Ministrja e Punëve të Jashtme, u shpreh se do të punojnë edhe më shumë në mënyrë që mërgata të përfshihet dhe të kontribuojë në Kosovë.