Ministrja e Drejtësisë, Albulena Haxhiu, e ka përkujtuar ish-bashkëpartiakun, Astrit Dehari në 6 vjetorin e vdekjes së tij.
Haxhiu përmes një postimi në Facebook ka akuzuar Prokurorinë e Shtetit, e cila sipas saj, ka dështuar që të zbulojë rastin e vdekjes së Astrit Deharit.
“Rrethanat e vrasjes së Astritit mbesin padrejtësisht enigmë, për shkak të mos veprimit të Prokurorisë. Janë të domosdoshme veprimet për zbardhjen sa më të shpejtë të rrethanave të vrasjes së Astritit, hetim i gjithanshëm që shoqërohet me efikasitet dhe rezultate që shfaqin të vërtetën, në bazë të provave dhe fakteve të pakonstestueshme të cilat janë në duart e organeve të ndjekjes”.
Sipas saj, “neglizhenca e Prokurorisë po e vonon drejtësinë” dhe “rasti Dehari nuk mund të zbardhet me pasivitet prokurorial”.
Tutje, Haxhiu ka thënë se zbulim i rastit vendos drejtësinë për Astritin, dhe është “fitore e drejtësisë ndaj manipulimeve sistemike që rrodhën që në orët e para pas vdekjes së tij”.
Ajo ka përfunduar duke bërë thirrje për institucionet e shtetit, që ta zbardhin rastin e Astritit në mënyrë që shoqëria ta kuptojnë të vërtetën.
Astrit Dehari kishte ndërruar jetë në rrethana të mistershme në Qendrën e Paraburgimit në Prizren, derisa ishte arrestuar për sulmin mbi Kuvendin e Kosovës.