Ministrja e Drejtësisë, Albulena Haxhiu, e ka quajtur “skandaloz dhe të padrejtë” vendimin e Gjykatës Themelore në Pejë, e cila ka dënuar me 7 vjet e gjysmë burgim, Shaban Gogajn, për veprat armëmbajtje pa leje dhe vrasje nga pakujdesia.
Haxhiu ka thënë se duhet të merren në konsideratë të gjitha rrugët ligjore për rastin e vrasjes së Agonis Tetajt në mënyrë që “të vendoset ligjshmëria e plotë dhe të jepen vendime meritore”
“Aktgjykimi i sotëm mund të jetë gjithçka tjetër vetëm drejtësi jo!”, ka shkruar Haxhiu.
Sipas saj, procesi gjyqësor ndaj personit të dyshuar është zhvilluar me shumë probleme dhe është karakterizuar me shumë çështje që e kanë penguar një proces të drejtë dhe efikas.
“Si ministre e Drejtësisë nuk kam mandat e as intencë për të ndërhyrë në asnjë rast gjyqësor, mirëpo është e domosdoshme të theksohet se sikur opinioni publik, jam e shqetësuar me mënyrën e administrimit të këtij procesi, përfshirë këtu edhe shkallën e dënimit me aktgjykimin e sotëm”, ka shkruar ajo në rrjetin social Facebook.
Gjithashtu, ajo ka thënë se shteti i së drejtës kërkon vendosmëri të personave që ushtrojnë detyrën zyrtare në organet që janë bartëse të sistemit të drejtësisë.
Ndërkaq, sipas saj, Kosova ka nevojë për prokurorë “të ndershëm e profesionistë që me precizitet hetojnë rastet dhe po ashtu gjyqtarë që marrin vendime brenda suazave të ligjshmërisë dhe në përputhje me provat e faktueshme të rastit”.
Vrasja e Agonis Tetajt cilësohet si vrasje nga pakujdesia, Shaban Gogaj dënohet me 7 vjet e gjysmë