Qeveria e Kosovës ka ndarë 3 milionë euro për mbulimin e polisës kufitare për mërgimtarët. Vendimi është miratuar në mbledhjen e Qeverisë së Kosovës të mbajtur sot.
Ministri i Financave, Hekuran Murati, ka folur për këtë çështje, duke thënë se vitet e kaluara ka pasur formate të ndryshme sa i përket zbatimit, por kësaj radhe do të ofrohet falas.
“Jemi të vetëdijshëm që në vitet e kaluara ka pasur formate të ndryshme të zbatimit, meqenëse kishte edhe kërkesa të tilla që ndoshta jo të gjithë kanë nevojë, disa edhe nuk duan të rimbursohen, prandaj ishte ofruar edhe mundësia që të ketë rimbursim, megjithatë ajo është dëshmuar që ka qenë paksa jo e përshtatshme. Kësaj radhe është që të ofrohet falas, jo me pagesë dhe rimbursim më pastaj, falas që në fillim,” ka thënë Murati.
Murati tregoi se pagesa e polisës mund të bëhet edhe në mënyrë elektronike.
“Ajo mund të bëhet online që mund të nxiret para nisjes edhe në telefon të shkarkohet apo me kodin, “QR” që kur arrin te pika kufitare ta ketë polisën kufitare.”
“Sa i përket fillimit të zbatimit, ne pas këtij vendimi për autorizim dhe ndarje të mjeteve do të konsultohemi me Bankën Qëndore të Republikës së Kosovës dhe Byronë kosovare të sigurimeve, në mënyrë që të nënshkruajmë edhe memorandumin për hapa të mëtutjeshëm,” shtoi Murati.
Ai tha se bashkatdhetarët do të njoftohen për datën se kur fillon dhe zbatohet ky mbulim.