Gazetari shqiptar që ndodhet në Pekin, Edison Murteza, ka folur për vizitën e sekretarit amerikan të Shtetit, Antony Blinken, në Kinë. Sipas tij, kjo vizitë ka qenë më pozitive sesa pritej. Megjithatë, Kina ka vendosur që nuk do të bëjë kompromis për Tajvanin.
“U nënshkruan shumë marrëveshje, ndodhi shumë më shumë se që pritej. Me kryeministrin kinez u arritën shumë pika pozitive. Kjo vizitë ka qenë shumë e mirëpritur, edhe pse pritshmëritë kanë qenë shumë të ulëta. Vizita e Blinken ka qenë lajm kryesor në mediet kineze e ndërkombëtare”, ka thënë Mureza, në një intervistë për Edicioni Special në Klan Kosova.
Mirëpo, sipas Murtezës, Kina ka qenë e vendosur se nuk do të bëjë kurrfarë kompromisi me ShBA-në për sa i takon çështjes së Tajvanit.
“Tajvani është pika kyçe, apo më e zjarrta e Kinës. Pekini e ka bërë të qartë që Tajvani është pjesë territorial e Kinës dhe do ta marrë nëse është nevoja edhe me luftë. Kina ka vendosur që nuk do të bëhet asnjë kompromis për Tajvanin”, ka shtuar ai.
Mureza ka shtuar se Blinkeni është ftuar të shkojë sa herë të dojë në Kinë, derisa edhe ky i ka ftuar liderët kinezë ta vizitojnë ShBA-në.