Administrata Tatimore e Kosovës (ATK), për gjashtë muaj ka mbledhur të hyra mbi 355 milionë euro.
Këtë e ka bërë të ditur, drejtori i Administratës Tatimore të Kosovës, Ilir Murtezaj, i cili në konferencë për media të përbashkët me ministrin e Financave, Hekuran Murati, ka prezantuar rezultatet e aktiviteteve të zhvilluara për periudhën janar-qershor të vitit 2022.
“Të hyra prej 355.5 milionë euro tatime, në krahasim me planin kemi rritje prej 26.5 milionë euro, apo 8.1 për qind”, ka deklaruar Murtezaj.
Po ashtu, Murtezaj tregoi se cilët ishin faktorët që ndikuan në rritjen e të hyrave, ku sipas tij ka ndikuar fuqizimi i kontrollit të brendshëm në shpenzimin e parasë publike, pra rritja e kontrollit dhe llogaridhënies ka rritur besimin e bizneseve.
“Në rritje ka ndikuar fuqizimi i kontrollit të brendshëm, pra rritja e kontrollit dhe llogaridhënies, rritja e transparencës. Kur kemi transparencë në shpenzimin e parasë publike, rritet besimi i bizneseve, ka transparencë edhe brenda institucionit. Gjithashtu ka ndikuar edhe rritja e efikasitetit të borxheve tatimore dhe digjitalizimi i shërbimeve”, tha ai.
Gjithashtu, ai ka bërë edhe prezantimin e reformave të rimbursimit të tatimeve, ku tha se është kthyer besueshmëria në këtë proces.