Deputetja e Partisë Demokratike të Kosovës (PDK), Ganimete Musliu, do t’i nënshtrohet një ndërhyrjeje kirurgjikale, e cila do të kryhet jashtë vendit.
Deputetja Musliu ka thënë se është diagnostikuar që dy vjet me një problem në zemër.
Ajo ka shkruar në rrjetin social, Facebook se do të largohet përkohësisht nga puna e saj si deputete e Kuvendit të Kosovës.
“Tani, me rekomandim të mjekëve kosovarë, më duhet t’i nënshtrohem një ndërhyrjeje kirurgjikale, e cila (për fat të keq) do të kryhet jashtë vendit, pasi që mjekëve në Kosovë, përkundër kompetencës së shkëlqyer profesionale, ende nuk u janë krijuar kushtet që ata i meritojnë”, ka shkruar ajo.
Ajo ka falënderuar repartin e Kardiologjisë dhe Kardiokirurgjisë në QKUK, Spitalin Amerikan që janë kujdes për të dhe të gjithë ata të cilët janë lutur dhe i kanë uruar gjithë të mirat.
“Gjatë gjithë kohës jam trajtuar në Kosovë dhe dua të falënderoj të gjithë mjekët që punojnë në repartin e Kardiologjisë dhe Kardiokirurgjisë në QKUK dhe në Spitalin Amerikan që u kujdesën për mua. E falënderoja po ashtu çdo institucion dhe çdo individ që ishte pranë meje dhe më ofroi mbështetje”, ka shkruar Musliu në Facebook.
“Mëqe me duhet të tërhiqem përkohësisht nga puna ime e përditshme, dua t’ju falënderoj të gjithëve pa dallim, që më keni shkruar, jeni lutur për mua dhe më keni uruar gjithë të mirat”, ka thënë mes të tjerash ajo.