Deputetja e Partisë Demokratike të Kosovës (PDK), Ganimete Musliu, përmes një statusi në Facebook, ka bërë një kërkesë për të gjithë deputetët e Kuvendit të Kosovës.
Ajo ka kërkuar nga ana e tyre që të mos e lejojnë futjen e deputetëve të Listës Serbe në Kuvendin e Kosovës.
“Nëse jo KQZ-ja e Kushtetusja, duhet te mobilizohem ne, deputetët e Kuvendit të Kosovës, pa dallim partie, pozitë e opozitë dhe mos ti lejojmë deputetët e Listës Serbe me u fute në Kuvend. Çka është mjaft është mjaft!”, ka shkruar Musliu.
Ndryshe, Lista Serbe e ka kundërshtuar aksionin e Policisë së Kosovës sot gjatë orëve të hershme të mëngjesit, e cila i bastisi pesë prona në veri të vendit, shumica prej tyre prona të kriminelit Milan Radojçiq.
Në një reagim të Listës Serbe thuhet se bastisjet ishin brutale dhe të paligjshme.
Po ashtu, ata e kanë kritikuar edhe EULEX-in, i cili, sipas tyre, vetëm i ka vëzhguar bastisjet nga larg.