“MAShTI nga ky vit mësimor do të fillojë me gjurmimin e të diplomuarve në shkollat profesionale dhe në Qendrat e Kompetencës, si reformë kyçe për të kuptuar se cilat janë kërkesat e tregut të punës, cila është relevanca e profileve të studimit me vendin e punës”.
Kështu ka shkruar në Facebook, ministrja e Arsimit, Shkencës, Teknologjisë dhe Inovacionit, Arbërie Nagavci.
Sipas saj, gjurmimi i të diplomuarve do të ofrojë për herë të parë evidencë, e cila do të udhëzojë rishikimin e profileve të studimeve të shkollave profesionale dhe do të rrisë përgjegjësinë në shkollë për një ofertë më cilësore të studimeve.
“Ndërlidhja me tregun e punës fillon kur të kuptojmë se ku nis rrugëtimi i studentëve tanë pas diplomimit. Jemi të përkushtuar për ndërlidhjen e studimeve me tregun e punës dhe ky përkushtim tashmë do të marrë trajtën e duhur”, shtoi ajo.
Ndërkaq, më 21 maj të vitit 2022, Nagavci, kishte njoftuar se në bashkëpunim me Policinë e Kosovës, Zyrën e Kryeministrit dhe disa institucione të tjera kanë iniciuar themelimin e Forumit Nacional për përcjelljen e situatës së sigurisë në shkolla.
Sipas Nagavcit, me këtë hap do të synohet rritja e mirëqenies dhe sigurisë në shkollat e Kosovës.
Përveç sigurisë në shkolla, sipas të parës së arsimit, ky forum do të shërbejë edhe për të rritur cilësinë në arsim.