Ministrja e Arsimit, Arbërie Nagavci, në lidhje me rekrutimin e stafit akademik në Universitetin e Prishtinës ku pretendohet se ka pasur shkelje procedurale e përmbajtësore në konkursin e fundit, ka thënë se dikasteri të cilin e udhëheq në bashkëpunim me UP-në ka filluar që të trajtojë me profesionalizëm dhe paanshmëri këto pretendime.
“Kohët e fundit kemi pranuar me shqetësim një numër ankesash dhe adresimesh në forma të ndryshme të pretendimeve për shkelje procedurale dhe përmbajtësore, nga kandidatët e konkursit për staf akademik në Universitetin e Prishtinës. Duke respektuar në plotni pavarësinë institucionale të UP-së, kemi kërkuar që këto pretendime të trajtohem me profesionalizëm dhe paanshmëri nga mekanizmat e brendshëm të Universitetit”, ka shkruar Nagavci në Facebook.
Pa u ndalur në detaje dhe raste specifike, Nagavci ka thënë se janë duke i marrë me shqetësim pretendimet e kandidatëve me kredenciale të larta akademike dhe profesionale, me numër të madh të publikimeve në revista të indeksuara ndërkombëtare, numër të madh të citimeve dhe me “H-faktor” shumë të lartë, “e të cilët rezulton se nuk janë përzgjedhur nga strukturat e brendshme të UP-së në konkursin e fundit”.
Ajo pret që këto raste të pretenduara të trajtohen me kujdes, në mënyrë meritore dhe me transparencë të plotë nga organet e UP-së, dhe të adresohen nga komisione të kualifikuara, me kredenciale akademike dhe kredibilitet për t’i trajtuar ankesat e parashtruara.
“MAShTI është në pritje të reflektimit dhe trajtimit nga mekanizmat adekuatë brenda institucional, të cilët do të trajtojnë këto ankesa me seriozitet dhe profesionalizëm të lartë, duke u bazuar në legjislacionin në fuqi dhe në praktikat më të mira ndërkombëtare. Bashkëpunimi ministri-universitet është i lidhur ngushtë me zbatimin e akteve ligjore dhe rregullativave të brendshme, prandaj edhe reflektimi mbi këto ankesa mbetet i domosdoshëm”, ka vijuar ajo.
Në drejtim të përmirësimit të praktikave të instaluara, Nagavci beson se me statutin e ri të Universitetit të Prishtinës “do të rregullohet sistemi i rekrutimit të stafit në bazë të meritokracisë, do të hapet për kuadro elitare, do të ndalohen praktikat e nepotizmit dhe do hapen mundësitë për angazhim pa pengesa të stafit akademik nga mërgata”.
Tutje, ajo ka theksuar se MAShTI inkurajon të gjitha institucionet e arsimit të lartë në Republikën e Kosovës që të hapen, duke mundësuar kështu rekrutim të jashtëm të personave të kualifikuar dhe të cilët janë të interesuar të kontribuojnë në sistemin e arsimit të lartë.
“Rekrutimi i stafit akademik bazuar në meritokraci mundëson garë të brendshme, rrit numrin e publikimeve shkencore dhe cilësinë e mësimnxënies, duke garantuar kështu arritje të rezultateve të të nxënit dhe avancim të performancës së institucioneve”, ka përfunduar Nagavci.